گوره هسې کردگار دی رب زما

گوره هسې کردگار دی رب زما - چې صاحب د کل اختیار دی رب زما همګي بزرگواران چې څوک یې وایي - تر همه ؤ بزرگوار دی رب زما نه یې هېڅ حاجت په چا باندې موقوف دی - نه د هېڅا منت بار دی رب زما له نیستۍ یې د هستۍ صورت پیدا کړ - هسې رنگ پروردگار دی رب زما هم صانع دی د جملې ؤ مصنوعاتو - هم سامع د هر گفتار دی رب زما چې یې هېچرې نه مثل نه مثال شته - د هغو عطر و عطار دی رب زما هر تعمیر چې د دنیا او د عقبیٰ دی - د همه واړو معمار دی رب زما خواننده د نانویستو صحیفو دی - داننده د هر اسرار دی رب زما که ظاهر دی که باطن دی که مابین دی - له همه ؤ خبردار دی رب زما که پیدا که پوشیده دی که اوسط دی - په همه ؤ وقوف دار دی رب زما شریک نه لري په خپلې پادشاهۍ کښې - بې شریکه شهریار دی رب زما هسې نه چې واحدي ده له عجزه - په واحد وجود بسیار دی رب زما حاجت نه لري د هېچا و یارۍ ته - له هغو سره چې یار دی رب زما څه حاجت دی چې و بل خوا ته یې غواړم - په خپل کور کښې همکنار دی رب زما هیڅ تغییر و تبدیل نه لري رحمانه - تل تر تله بر قرار دی رب زما